Kalaallit Røde Korsiat Ilulissaniittoq massakkut checkimik kr. 8208,- naleqartumik tigusaqarput Ilulissat Center Markedip pisisartuinit, Kaffigooq-mik pisinermikkut puiaasallu utertitanik akissaraluinik pisiniarfimmut tunniussisimasunit katersorneqarsimasunik. Aningaasat isertut tamarluinnarmik Kalaallit Rødekorsiata Ilulissani ikiorneqarnissamik pisariaqartitsisunut sulineranut atugassanngorlugit tunniunneqarput.

”Pisisartutsinnit taamatut tapersersorneqarnerput tulluusimaarutigeqaarput, taakkuami  1. septemberimiit periarfissinneqarsimapput puiaasat utertitanik akissaralui tigunagit Kalaallit Røde Korsiannut tunissutigisarsimavaat.  Puiaasat puujuisa akissaralui kisimiillutik kr. 2.208,-put, naak piffissaq taamma sivisunngitsigigaluartoq. Tamannalu torralaanerujussuuvoq,”  Peter Frederik Olsen, ICM-imi pisiniarfimmi pisortaq oqarpoq. 
   
Pisisartut taama kusanartumik puiaasat puukuinit akissarsiassaagaluaminnik tunniussinerata saniatigut Kaffigooq pisiarineratigut aamma isertitaqartorujussuuvoq, Kaffigooq poortaq ataaseq pisiarineqaraangat 1 kr. nakkartinneqartarmat. Tamatuma saniatigut aamma Arctic Importip suliffeqarfinnut Ilulissanilu pisisartunut allanut tunisaasigut poortamut ataatsimut 1 kr. nakkartinneqartarpoq.

Kalaallit Røde Korsianni ICM-imiit checki, ukiut tamaasa pisartumik Ilulissani juullerpalaartitsinermut atatillugu tunniunneqartoq,  nuannaarutigineqarpoq.

“Isertitat puujaasat utertitassaaningaanniik aammalu kaffi tuniniarnerani isertinneqartut ikiortarpaatigut ikiuisinnaanngortilluta inunnik allanik. Nunaqqatinut assut iluaqutaasarpoq juullimi koorimik  pissakinnerusut ilaqutaariit tunisinnaalersarattigit,” taama oqaaseqarpoq Rachel Reimer Jensen qujassuteqarluni Kalaallit Røde Korsiat-ninngaanniit.

Puiaasat imaqanngitsut akissaraluinik Kaffigooq-rlu aqqutigalugu katersineq Ilulissat Center Marked-imi ingerlaannarpoq.
 
”Puiaasanik utertitanik Kalaallit Røde Korsiannut katersinerput ingerlatiinnarparput, peqatigitillugulu Kaffigooq tunisat aqqutigalugit katersineq ingerlapparput. Uagutsinnummi najukkatsinni ikiuiniaqatigiiffiup ikiuiniarnikkut sulineranik  tapersersuinissaq pingaartuuvoq – sulinermi taamaattoq pisariaqartinneqarpoq – nuannerluinnarporlumi pisisartugut tamatuminnga tapersersuilluinnarmata.  Tamannalu qujassutigeqaarput,” Peter Frederik Olsen naggasiivoq.