Arctic Importitut kalaallit/qallunaat ingerlatsiviugaanni pikkorissunik paasisimasaqarluartunillu kalaallit kulturiannik paasisimasaqartunik kalaallisullu oqalussinnaasunik sulisoqarnissaq pingaartuuvoq. Taamaattumik Aalborgimi Kalaallit Illuat SEASHOW –eqartitsivoq – tassa Kalaallit Nunaanni sulisussanik ilinniartitsineq siunertaqartoq Kalaallit Nunaata Danmarkillu akornanni inuusutissarsiornikkut kulturikkullu suleqatigiinnermik ilinniartitsinermik siuarsaaniarneq.  

Messe nammineq umiarsuarmi Safaq Ittuk-mi ingerlanneqarpoq illoqarfinnik Ilulissanik, Aasiannik, Sisimiunik, Maniitsumik Nuummillu aqqusaartuisillugu. Illoqarfinni tamani ”åben skib”-eqartarpoq soqutiginnittut tamarmik tikilluaqquneqarlutik saqqummersitat assigiinngitsut Jyllandip avannaani inuussutissarsiornermik tamaanilu ilinniarfinnik takutitsisut naapissinnaallugit. Ataatsimut isigalugu illoqarfinni tallimani inuit 2096-it takuniaapput – tassa nunatta inuisa tamarmiusut 4%-ingajalluinnaat, taamaattumik aaqqissuussineq iluatsilluartutut oqaatigisariaqarunarpoq.

- Uagutsinnummi pingaartuuvoq ingerlatsiviup ullumikkut sulisuisa sulisuulerumaarsinnaasullu attavissaqarfilernissaat, HR Chef Anja Andreassen oqaluttuarpoq nangillunilu, -  massakkut sulisugut sulisorisarsimasagullu kalaalit kalaallinillu aallaaveqartut amerlaqaat tamannalu uagutsinnut pisisartutsinnullu assut iluaqutaavoq, aaqqissuussinermullu tassunga peqataanikkut periarfissaqalerpoq ilinniartunik siunissami sulisuulerumaartunut attaveqarnissamut.

Arctic Import 1978-imiilli Nunatsinniilerpoq, tassa tunngaviliisui Ole Nielsen aamma Poul Jørgen Nielsen taamani aallartimmata qisuusiveqarneq samminerullugu. Kingorna ingerlatsivik annertusiartuinnarsimavoq annertoorujussuanngorluni sammisarpassualik Kalaallit Nunaanni allaffimmik tuniniaaveqartoq, showroommeqartoq, niuvertarfeqartoq Nuummilu, Ilulissanilu Uummannamilu supermarkedeqartoq – taamaattumik suliffinni assigiinngitsorpassuarni sulisussanik pisariaqartitsineqarpoq aqqissuussinerlu SEASHOW –itut ittoq tamakkuninnga naapitsivissatut piukkunnarluinnartuuvoq.